Mədəniyyət Region

Gəncədə “Qadınlarımızı dəstəkləyək” adlı satış sərgisi keçirilib

Gəncə “Sahibkar qadınlar” İctimai Birliyinin və “Qızıl əllər” məhdud məsuliyyətli tədris müəssisəsinin təşkilatçılığı ilə Gəncədə ölkə üzrə mentor və gənc sahibkar qadınların istehsal etdiyi məhsullardan ibarət “Qadınlarımızı dəstəkləyək” adlı satış sərgisi keçirilib.

365.com.az Azərtac-a istinadən məlumat verir ki , 250-dən çox sahibkarın iştirak etdiyi tədbirdə əl işi sənətkarlığı, toxuculuq, xalçaçılıq, kənd təsərrüfatı məhsulları və s. sərgilənib. Sərgi çərçivəsində işgüzar görüşlər keçirilib.

“Sahibkar qadınlar” İctimai Birliyinin sədri Zenfira Ağayeva bildirib ki, ölkəmizdə qadınların sahibkarlıq fəaliyyətinə cəlb olunması məqsədilə hər il mütəmadi olaraq müxtəlif tədbirlər keçirilir. İşgüzar xanımlar bu tədbirlərdə öz məhsullarını sərgiləyir və onların satışını həyata keçirirlər. Tədbirin məqsədi sahibkar qadınların fəaliyyətini gücləndirmək üçün onlarla dövlət və qeyri-dövlət nümayəndələri, təşkilat rəhbərləri, bank işçiləri və digər aidiyyəti şəxslər arasında əlaqələr qurmaq və inkişaf etdirməkdir. Qadın sahibkarların iştirakının nəzərdə tutulduğu sərgiyə kişi sahibkarlar da qatılıb. Sərgi zamanı sahibkarların nümayiş etdirdiyi məhsulların, eyni zamanda, satışının həyata keçirilməsi gənc sahibkarlarda böyük stimul yaradıb. Müxtəlif bölgələrdən olan sahibkarların əlaqə qurmasının vacibliyini vurğulayan Zenfira Ağayeva birgə əməkdaşlıqla gələcəkdə daha da uğurlu nəticələr əldə etmək ehtimalının yüksək olduğunu vurğulayıb.